La obra d’´ntón contempla, como correspuende a un artista dedicáu dafechu a la creación, maneres d´espresión artística múltiples; asina, amás d´escultures, la so producción artística arriquezse con acuareles, óleos y dibuxos.

D´esta vuelta queremos presentar a Antón non pol so llabor escultóricu, sinón pol artista capaz a efectuar retratos escelentes que fixo bien al oleu o bien col llápiz. Al presentar al públicu esta serie de retratos queremos dar a conocer la capacidá que tenía esti artista pa la observación de la vida y pa la caracterización psicolóxica de los personaxes representaos.

El xéneru del retratu ta presente yá nes obres más tempranes d´Antón, 1928, y caltiénse hasta lo postrero de la so vida tan curtia. Ello ye que la so última obra producida foron los retratos a llápiz de los sos compañeros de cautiveriu realizaos n´agostu de 1936 na ilesia de Candás, que facía les veces de cárcel.

Esta clas d´obres garren un sitiu pequeñu n´estensión nel conxuntu de la so producción artística, porque la so vida dedicada con tanta intensidá al arte tuvo centrada más na realización d´escultures.