Circuitu d´artes visuales

Nesti proyectu artísticu, Ros Boisier entra nel monte de Muniel.los pa esperimentar coles formes de representación del paisaxe natural, les característiques técniques de la fotografía, l’alteración del tiempu fílmicu y les posibilidaes alegóriques del rexistru y la percepción visual.

Muniellos propón un diálogu ente paisaxes en distintos soportes y formatos nel que la sustracción, la multiplicación y la repetición espanden el tiempu y la percepción de los rexistros visuales y sonoros. Estratexes que proponen desafiar la mirada tradicional dirixida al paisaxe y pensar sobre les rellaciones ente arte, cultura, sociedá, tecnoloxía y medioambiente.

La esposición tien una ayuda de la convocatoria pa producciones artístiques de la Fundación Municipal de Cultura, Educación y Universidá Popular del Conceyu de Xixón y forma parte del programa Asturies, Cultura en Rede, que la Conseyería de Cultura, Política Llingüística y Deporte del Principáu d’Asturies impulsa en collaboración colos conceyos asturianos pa la programación de proyectos espositivos d’artes visuales.