Nel marcu del so XX Aniversariu, el Muséu del Xurásicu d’Asturies entama un cursu gratuitu d’interpretación del patrimoniu paleontolóxicu del Xurásicu Asturianu con sesiones temátiques que se van desenvolver nel mesmu equipamientu y una xornada de campu p’analizar piedres y fósiles de distintes edaes y conocer la riqueza y diversidá xeolóxica del territoriu.

Al traviés d’un total d’once sesiones teóriques (11 hores), visita a les instalaciones (4 hores), una práctica (2 hores) y una xornada de campu (4 hores) van facilitase ferramientes efectives de comunicación pa favorecer l’espardimientu y caltenimientu del nuestru patrimoniu. Anque estes sesiones pueden ser d’un interés especial p’ampliar conocimientos en materia de dinosaurios y paleontoloxía, tamién van poder aplicase a la educación, la didáctica, l’ociu o’l turismu, y tamién al desenvolvimientu social y económicu que deriva del so aprovechamientu.

Duración: 21 hores.

Dirixíu pa: El cursu enfócase sobre manera a los campos de la Xeoloxía, Bioloxía, Ciencies de la Educación y Turismu, amás d’enseñances estracurriculares tales como monitores d’aules de naturaleza, educadores ambientales o guíes turísticos profesionales que quieran ampliar conocimientos en xeoloxía y paleontoloxía, en xeneral, y dinosaurios y otros vertebraos en particular, con cuenta d’aplicales a la investigación, la xestión, el caltenimientu, la comunicación o la divulgación del patrimoniu paleontolóxicu, xeolóxicu, natural y cultural.

De la mesma manera, esti cursu pue resultar d’interés pa cualquier persona con molición personal nel mundu d’estos reptiles fascinantes y el so hábitat.

Consulta’l programa completu y los métodos d’inscripción nesti enllaz.