L’oru: el so beneficiu, manipulación y relevancia social va ser el motivu de debate alredor del que van aconceyar n’Uviéu investigadores destacaos del ámbitu de la tecnoloxía del oru na Prehistoria y l’Antigüedá.

Ente’l 29 y 31 d’ochobre, el públicu interesao va poder conocer, de la so mano, les últimes novedaes nel campu de la minería, la metalurxa y l’artesanía con metal precioso. Va haber oportunidá pa discutir sobre les llinies d’estudiu y los descubrimientos de más recién producíos n’Asturies y Galicia, con atención singular a los apurríos coles escavaciones arqueolóxiques del Proyectu Beriso que promueve la Fundación Valdés-Salas. La dirección científica ye d’Ángel Villa Valdés y Rubén Montes López. La inscripción ye gratuita y les sesiones van poder siguise en persona o bien per enllaz.