Circuitu d´artes escéniques

Esta ye la historia d’una maleta colorada que vivía nun monte verde... Más bien esta ye la historia d’una neña que vivía nuna maleta colorada que vivía nun monte verde. El so nome: Ana. Ana y la so maleta vivíen debaxo del arbolón mariellu númberu 104 del Monte de les coses perdíes. Ana nun sabía cómo ella y la maleta llegaren hasta ellí. Namás sabía que yera lo único que tenía nel mundu y qu’ésta conteníala en más d’una forma. Nun conocía otra cosa y esi yera’l so universu. Na so maleta tamién vivíen unos cuantos oxetos que-y facíen compañía. Oxetos coleccionaos quién sabe ónde y quién sabe cuándo, pero que xeneraben esa sensación tan prestosa de “casa”. Toos tenemos oxetos que nos presta llevar a tolos llaos, que nos ayuden a formar la idea de lo que somos; asina yeren les coses qu’Ana guardaba con ella na so maleta.