El Pozu Santa Bárbara, nuna muestra impulsada pola Conceyalía de Cultura del Conceyu de Mieres y comisariada por L.E.V. (Llaboratoriu d’Electrónica Visual), presenta l’últimu proyectu del estudiu d’arte italianu fuse*: Onirica (), una instalación audiovisual que materializa n’imáxenes en movimientu los suaños reales de miles de persones usando intelixencia artificial.

Esplorando la dimensión de los suaños y interpretando al traviés de llinguaxes sintéticos la capacidá creativa de la mente humana mentes duerme, la obra usa algoritmos capaces a traducir testos n’imáxenes, llevando al terrén de lo visible los nuestros rellatos nocturnos y proponiendo reflexones nueves sobre la rellación ente’l ser humanu y la máquina, ente la ferramienta y el creador. Con Onirica (), fuse* tresforma nuna esperiencia colectiva los suaños de les munches persones voluntaries que participaron nes sesiones previes d’investigación na Universidá de Boloña y la Universidá de California Santa Cruz. Escoyíes a partir d’una base de 28.748 rellatos, les trames d’esta pieza fluyen una dientro d’otra como una serie de curtiumetraxes, protagonizaos por dellos personaxes, oxetos y paisaxes.

La instalación acentúa la tensión creada pola interpretación y traducción d’una esperiencia puramente humana, el suañu, al traviés de los güeyos de les tecnoloxíes nueves, asitiándose dientro d’un debate éticu cada vez más relevante. La muestra incluye amás elementos esclusivos nunca espuestos xunto al proyectu: una serie de grabaos sobre plexiglás y una pantalla interactiva onde se pueden esplorar los bancos de suaños nos que se basa la obra.