Anna Bolena, estrenada nel Teatru Carcano de Milán en 1830, consagró a un Donizetti mozu como ún de los grandes talentos del momentu n’Italia y n’Europa.

Esta ópera a partir de 1881 desapaeció dafechu del repertoriu, siendo recuperada a mediaos del sieglu XX cuando se dio la llamada «Donizetti Renaissance». El llibretu de Felice Romani inspiróse en dos drames italianos, Enrico VIII d’Ippolito Pindemonte (1816), y Anna Bolena d’Alessandro Pepoli (1788). L’argumentu de la ópera desenvuélvese na corte del depraváu Enrique VIII, en concreto, nel so segundu matrimoniu con Ana Bolena, qu’acabó axusticiada na Torre de Londres. La ópera, con un llibretu de gran calidá, con personaxes bien trazaos y con una gran eficacia teatral, termina cola famosa escena final onde la reina, yá a puntu de morrer, alterna momentos de llucidez y de deliriu, anticipando la escena de la llocura de Lucia di Lammermoor. Esta ópera, con Lucia, ye una de les más valoraes dientro de les sos óperes series.