Los Vinck. Una saga de fotógrafos de Gijón (1905-2007)
Xixón, 15/05/2024 10:00
Artes Visuales
![Los Vinck. Una saga de fotógrafos de Gijón (1905-2007)](/uploads/fotos/FeNbBaZEcTPuJVwufyKLDh5VzeyCh7DM.jpg)
Del 15 de mayu al 30 de setiembre de 2024
Horariu de visita: de martes a domingu de 10:00 a 19:00 h.
Esta esposición ta dedicada a una de les sagues más relevantes del sieglu XX n’Asturies, entamada en 1905 por Laureano Vinck Carrió, siguida pol fíu, Gonzalo Vinck, y rematada pol nietu Octavio.
Nel añu 2023 el Muséu del Pueblu d´Asturies recibió de manes d’Octavio Vinck la donación de la so colección, formada por cuasi 3.500 fotografíes nos soportes y formatos más diversos, cámares y material fotográfico, oxetos personales y documentación variao que vieno a arriquecer los fondos colos que yá cuntaba´l Muséu d´una de les sagues de fotógrafos más relevantes de la fotografía xixonesa del sieglu XX. En 1856, Luis Vinck Caña (Sars-Poteries, 1819, Xixón 1881) y el so fíu Luis Vinck Huart (Sars-Poteries, 1847, Xixón, 1937) treslládense a Xixón dende Francia pa trabayar como maestru y oficial vidreru na fábrica La Industria, fundada en 1844. La llegada de personal cualificao a les factoríes xixoneses constituyó ún de los factores pal desenvolvimientu del cine y la fotografía y mui concretamente esta fábrica, onde tamién trabayare Arturo Truan Luard (Nyon, Suíza, 1837-Xixón, 1890). La saga de fotógrafos de los Vinck inauguróse en 1905 por Laureano Vinck Carrió, nietu de Luis Vinck Caña, y la so muyer Aurora Sánchez, sigue col matrimoniu formáu por Gonzalo Vinck y Victorina Díaz, pa rematar nel añu 2007, fecha na qu´Octavio Vinck cesa l´actividá.