Valeria Castro tien una voz escepcionalmente delicada y conmovedora, capaz a evocar emociones fondes. Nel so álbum debut, tituláu Con cariño y con cuidado, ufiértanos una introspección personal, un exerciciu d´autoestima y amor propiu. Ye evidente que Valeria namás se dedica a temes que realmente la afecten y emocionen. La so conexón col so llugar de nacencia, La Palma, la so familia y la so contornada, ye innegable.

Nel so cantu nun se representa namás a sí mesma, sinón que se convierte na voz del so pueblu y la so forma de vida. Encarna la sinceridá y la esencia, mostrando una autenticidá apalpable que toca´l corazón de quien la siente.
Tamos delantre d´un trabayu con un filu conductor o una espina dorsal. Ye l´autorretratu d´una rapaza isleña ultrasensible que s´abre en canal y dexa que nos asomemos nes coraes mesmes del alma. El testimoniu, en primer persona del singular, d’una moza que fai de la so verdá´l niciu irrenunciable del so mensaxe. La zona cero d´una confesión d´empatía y sinceridá ablucantes.

Con 24 años, Valeria Castro dexó de ser una promesa pa convertise nuna realidá na música hispanofalante. Inclusive depués del so descubrimientu por Alejandro Sanz n´Instagram y la so actuación conxunta en Corazón Partío, demostró ser una de les voces más prometedores de fala hispana. El so primer álbum va presentase en más de 10 países, y compartió l´escenariu con artistes de sonadía como Vetusta Morla, Silvana Estrada y Vicente García.

En setiembre del 2023, Valeria recibe la so primer nominación a los Latin Grammy na categoría de Meyor Canción d’Autor pol so tema La raíz. Amás, ta nominada al Goya por meyor canción orixinal xunto a Vetusta Morla con El amor de Andrea.
El mes d´avientu pasáu del 2023 ganó´l Premiu Canariu de la Música a Meyor Canción del Añu, categoría na que taba nominada xunto a Quevedo.