La esposición Documento Monumento abarca más de trenta años de trabayu de Mathieu Pernot, una selec¬ción amplia del so trabayu dende primeros de los años noventa hasta anguaño.

La muestra incluye series hasta agora inédites. Destaquen les imáxenes feches nos clubes de boxéu de Marsella en 1994 y la serie fecha apocayá, va unos meses, en Melilla. Tamién s’esponen pela primer vez les semeyes de los edificios destruyíos de Beirut nel 2000, depués de la guerra civil libanesa, que vamos ver nesta esposición asitiaes cerca de les voladures controlaes d’edificios de la redolada de ciudaes franceses. La serie Los que gritan exhíbese xunto al material gráfico procedente de la cárcel parisina de La Santé.

La selección incluye Los Gorgan, ún de los trabayos fundamentales qu’acompaña a Pernot de magar empezó la so actividá fotográfica hasta anguaño. La familia Gorgan ta presente en dellos espacios de la esposición y protagoniza delles series.
Los llibros de Pernot tienen un papel destacáu na so trayectoria, porque cunta con cuasi una ventena de títulos publicaos hasta la fecha. Esta faceta d’editor tamién se destaca na muestra con una se¬lección de los sos proyectos principales, concebíos de manera diferente y complementaria a les propuestes espositives.