Circuitu de música

Música, cine y lliteratura abrácense na obra nueva de Losone, El silencio en el tiempo. El grupu asturianu presenta cuatro cantares que dialoguen con un amigu ausente. La música lleva a la palabra y la palabra a unes alcordances que nos evoquen imáxenes. El discu conviértese nun mediumetraxe que rescata una historia sobre la perda, un homenaxe duru y visceral y al empar cálidu como pue llegar a ser l’abrazu d’un amigu. Losone tresfórmase nun personaxe de la película al interpretar les pieces musicales en directo na sala de proyección.

El silencio en el tiempo ye en conxuntu una esperiencia de cine espandíu que quier trespasar la frontera bidimensional de la pantalla y crear un puntu d’alcuentru ente realidá y ficción, ente’l pasáu de la narración y el presente del directo.