The Poor ye una banda australiana de rock duru nacida en 1986 en Darwin (Northern Territory), daquella col nome de The Poor Boys. Los sos oríxenes tán mui rellacionaos con actuaciones nos pubs d’esa ciudá, hasta que, en 1992, decidieron grabar la so creación de debut, l’EP Rude, Crude & Tattooed, una mecedura de cantares de chigre australianu puru, directa, ensin medies tintes. Un añu depués llanzaron el so primer álbum, Who Cares, col so single más popular, More Wine Waiter, Please. Empezaron asina un par de décades d’éxitu implacable, cuando fixeron xires per tol planeta, percorriendo Australia, Europa y Xapón, y compartiendo escenarios con bandes de sonadía como Suicidal Tendencies, The Scorpions, Alice In Chains, Van Halen o W.A.S.P.

Depués de dellos periodos de parón, la banda, con Anthony (Skenie) Skene (voz/guitarra), Matt Whitby (baxu), Gavin Hansen (batería) y Daniel Cox (guitarra principal), vuelve a los escenarios y llega al Centru Niemeyer con material nuevo, pero ensin escaecer los sos grandes éxitos.