Norma ye quiciabes una de les grandes óperes de Bellini, del repertoriu belcantista y de tola historia de la ópera. El llibretu, de Felice Romani, ye una adaptación de la traxedia d’Alexandre Soumet Norma ou l’infanticide (1831), basada al empar na obra Les Martyrs, de Chateaubriand, (1809) y nel mitu de Medea. Ambientada nel mundu de los druides de la Galia, narra los amores de Norma, fía d’Oroveso –el Gran Sacerdote de los druides–, y un militar romanu. Celos, venganza, traición, piedá materna, amor apasionáu y redención constituyen los elementos característicos d’esta ópera de Bellini que representa la síntesis ente’l Neoclasicismu y un Romanticismu entá naciente.