Dramaturxa y escenificación del poemariu Poemes del Amor Simétricu

Autor: Milio Ureta

Disciplina: Artes escéniques

Descripción:

El proyectu trata d’amosar el procesu d’adaptación d’un testu poéticu a una propuesta lliteraria dramática (teatral y/o cinematográfica) y escénica. La idea del videu sostiénse en dos variables: dramaturxa y escenificación. El testu de partida ye Poemes del Amor Simétricu, una colección orixinal de 23 poemes nos que se desendolquen los temes del amor (deséu/alcordanza) y la xusticia social (vindicación de la identidá y defensa de lo diverso).

Nesti proyectu, el discursu del protagonista va crease a partir del enllaz dramáticu de los testos escoyíos. La voz poética queda convertida na voz del personaxe principal. La llinia d’acción, les necesidaes del personaxe y la peripecia condicionen la tresformación del texíu testual final.

Ente 1991 y 1995 Milio Ureta cursa estudios d’Interpretación nel Institutu del Teatru y les Artes Escéniques (ITTAE) de Xixón. Un añu dempués asiste al cursu de Creación Lliteraria de la Universidá d’Uviéu. En 1996 métese a trabayar como actor na compañía Réplika Teatro de Madrid y nel añu 2000 asiste al cursu de Formación Actoral del Teatro de la Abadía de Madrid y obtién la Beca p’Artistes de la Caja de Ahorros de Asturias. Nel 2001 empieza estudios de Dramaturxa y Dirección nel Institut del Teatre de Barcelona.

Como escritor, nel 2013 lleva’l premiu de rellatu curtiu Guillermo González de l’Asociación Cultural Amigos de Ribadesella (ACAR) col testu Puentes que sabe el puente y en xunu del 2019 publica’l so únicu llibru hasta la fecha, Poemes del Amor Simétricu.