Últimos VídeosNoticies

Seis esposiciones en mayu de la mano d’Asturies, Cultura en Rede

Cultura en Rede

Tamién va haber 34 actividaes en 20 conceyos nel marcu del circuitu de cultura tradicional o 20 funciones d’artes escéniques en 18 conceyos

29/04/2021.- Seis esposiciones d’artes plástiques y visuales van amosase na nuestra rexón nel mes de mayu de la mano de los circuitos d’Asturies, Cultura en Rede, el proyectu dela Conseyería de Cultura, Política Llingüística y Turismu realizáu en collaboración colos conceyos asturianos y xestionáu pola Sociedá Pública de Xestión Turística y Cultural del Principáu d’Asturies, que tamién incluye circuitos temáticos de cultura tradicional, artes escéniques, música o lliteratura per dellos conceyos del Principáu.

De la mano del circuitu d’artes plástiques y visuales van amosase seis esposiciones en cinco conceyos en mayu. N’Avilés exhíbese Trilogía poética: Al horru d’Ediciones Pata Negra hasta’l 9 de mayu, un homenaxe a esti elementu mueble tan representativu de l’arquitectura d’Asturies y d’España; y Fugarte, el proyectu artísticu multidisciplinar de l’Asociación d’Artistes Independientes Los Purificados, va vese nesti conceyu del 12 de mayu al 3 de xunu. En Colunga va tar del 3 al 28 de mayu Sinfinados, del artista visual y diseñador Toño Velasco, una reflexón sobre la esperiencia d’una sociedá trancada a la espera d’una vacuna; y en Mieres, del día 4 al 27, Los beneficios de la maleza de la Galería Lucía Dueñas, cola obra fonda, poética y meditada de l’artista Begmont (Belén García Montoya), detrás d’una estética primitiva y d’una simplicidá aparente. Una ventena d’escultores asturianos o forasteros vinculaos a la comunidá protagonicen De la escultura a la gráfica. Escultura contemporánea en Asturias llevada a la gráfica d’Ediciones Pata Negra, que se va esponer del 4 al 28 de mayu en Siero; y la obra pictórica y escultórica del artista asturianu Adolfo Manzano va llegar a Cangas del Narcea del 14 de mayu al 13 de xunu, con Evoluciones y Requexos de Guillermina Caicoya Art Projects.

34 actividaes en 20 conceyos diferentes conformen la programación del circuitu de cultura tradicional nel mes de mayu. Aladanza Educación y Tradición va tar con Arma’l to horru en Llanera y Sotu’l Barcu, cola actividá Vistiéndonos como antaño en Llanes y Cangas del Narcea y con Ponte la máscara en Colunga y Navia; y Ente les cuerdes de Rubén Bada, en Nava y Llanes. Va haber Cuentos, conseyes y marionetes d’Elisabet Martín Teatro en Grau, Llaviana, Siero, Llanera y Navia; La pareya de tambor y gaita nel repertoriu tradicional asturianu. El toque na fiesta y la romería d’Asociación Afatra en Nava; Los reyes asturianos de Laura Iglesia en Llanera, Xixón, Muros de Nalón, Siero y Les Regueres; Proyectu N.O.S. de L-R, en Cabranes, Villaviciosa, Cangas del Narcea y Ḷḷena; y en Bimenes va dase la conferencia L’horru asturianu y l’espíritu de la modernidá: 500 años d’arte tradicional d’Ástur Paredes, que tamién va falar sobre Les Brañes. Un averamientu a la cultura del pastoríu n’Asturies en Llanes. Carlos Alba Cellero va llevar Retafiles pa los ñacarinos a Siero y Contábenmelo en casa a Ḷḷena y Villaviciosa; Héctor Braga, Fundamentos a Sotu’l Barcu y Ḷḷena; y Maite Capín, la Ruta primitiva por Asturias a través del vestuario a Villaviciosa.A esto súmase Narración oral asturiana y taller de escritura creativa en Mieres y Tradicionando de Fabriok-Fábrica de ocio y producción en Cangues d’Onís.

Nel marcu del circuitu d’artes escéniques van realizase 20 funciones en 18 conceyos nel mes de mayu: Cazabacterias de Teatro del Cuervo en Tinéu; Retales d’Higiénico Papel Teatro y Cuentos de siempre para niños y niños de ahora de David Acera en Nava; La neña de les trences al revés en Noreña; Disculpe, Caballero de Zig Zag Danza en Castrillón; La talla 38… o fuera los grilletes de les fañagüetes de Carlos Alba Cellero en Cabranes; La casa de los cuentos de David Acera n’A Veiga; Niue, under the coconuts d’Escena Apache y Apestosos pero sabrosos de David Acera en Grau; En un rincón de la galaxia de Teatro del Cuervo en Tapia; Blancanieves XXI de Guayominí Producciones en Samartín del Rei Aurelio; Golem de Dana Raz Dance Projects, en Xixón y en Corvera; Llázaro de Tormes de Carlos Alba Cellero en Les Regueres; Raíces de Yhepa Títeres n’El Franco; Aullido de Teatro a las Puertas en Villaviciosa; ¿Rosa o azul? Lo que quieras tú. Personajes que rompen con roles de género d’Elisabet Martín Teatro en Ribadeva; En un lugar de la niebla de Ververemos en Siero; Matanza d’ElEncuentro Teatro y Ana Morán Cía en Sotu’l Barcu; y Swingers d’El Jaleo Producciones Artísticas en Llanera.

Va haber amás nueve eventos del circuitu de música con Hoot´n holler en Villaviciosa; con Petip Pop en Muros de Nalón y Cangues d’Onís; con Felpeyu en Sotu’l Barcu; con Los Berrones en Castrillón; cola Orquesta Céltica Asturiana y les Músicas del Arco Atlántico en Les Regueres; con Dixebra en Grau; con Delagua en Xixón; y con Trobadora del Cantábrico d’A Pedreira n’El Franco.

13 actividaes del circuitu de lliteratura van desenvolvese nel mes de mayu,ente les que s’incluyela esposición Una mitología. Seres y mitos del norte de Pintar Comunicación en Nava; la charla-esposición con valor históricu Para que no se olvide: 42:553 después de Buchenwald d’Ediciones Trabe en Corvera; Aprende y crea tú mismo (Cómo hacer un libro infantil) de La Maleta Ediciones en Navia; ¿A qué suenan los libros? d’El Arca de Mozart en Tinéu; Tradición oral asturiana: narración y talleres de escritura creativa d’Elisabet Martín Teatroen Les Regueres; y Taller lliterariu de ciencia ficción, fantasía y terror d’Ediciones Radagast en Xixón. Puppys va actuar en Siero; El Velcro, en Cangas del Narcea; Carlos Alba Cellero con Lo que me contó la Tía Carola, n’A Veiga; Gema Fernández con Animalías e incertidumbre, en Llanes; y Musa Cafeína va llevar Palabras como llaves a Grau y Gozón y Tierra Fada a Carreño.

A esto súmase’l circuitu Autores nel Camín, que pon en contactu al públicu asturiano colos ganadores de los premios lliterarios n’asturianu convocaos pola Conseyería de Cultura, Política Llingüística y Turismu. En mayu va haber alcuentros con Gonzalo G. Barreñada en Grau; con Francisco Álvarez González en Llangréu, Corvera y Villaviciosa; con Lafu y Rebeca (Alejandro Lafuente y Rebeca Velasco) en Corvera; con Ruma Barbero en Colunga, Nava y Ḷḷena; con Sidoro Villa en Carreño; y con Alberto Vázquez en Grau.

El cine tamién va tar mui presente nos conceyos asturianos gracies a la programación de La Cinemateca Ambulante que, cola collaboración de 17 conceyos, va ufiertar un total de 53 proyecciones repartíes nes 21 sedes coles que cunta esti programa de cine itinerante. Destaca esti mes la proyección de la comedia aceda Plácido de Luis García Berlanga –programada pola mor del centenariu de la so nacencia- y del llargumetraxe asturianu Obertura de un milagro de Juan Luis Ruiz, amás d’otros títulos reconocíos pola crítica como Bacurau o Dating Amber.

La programación de los circuitos d’Asturies, Cultura en Rede pue sufrir modificaciones a tenor de la evolución de la pandemia por Covid-19. Puen consultase les feches, horarios y la información actualizada en www.asturiesculturaenrede.es.

Slide 2