24/09/2024.- El circuitu de narración oral d’Asturies, Cultura en Rede sigue cola so programación d’actividaes de promoción a la llectura como cuntacuentos, narración o llectures dramatizaes nos conceyos asturianos.

Pa esti vienres 27 de setiembre hai trés cites programaes: Tras la Puerta Títeres va representar Engatusados en Nava, una obra onde va entemecese narración y teatros de papel pa disfrutar de los cuentos, los títeres y los cantares; Tragaluz Títeres va llevar Cuentoquetecuento a Villaviciosa con una maleta onde entren toa clas d’histories; y Laura Cuervo va mostrar en Ribeseya Cuentos del mundo al públicu infantil que tea dispuesto a escuchar histories de tolos llugares del planeta.

Nel marcu d’esti circuitu programáronse 35 eventos de 23 profesionales en 35 conceyos asturianos pal periodu de xunetu a avientu. La programación actualizada pue consultase n’asturiesculturaenrede.es.

Los circuitos d’Asturies, Cultura en Rede son un proyectu de la Conseyería de Cultura, Política Llingüística y Deporte, realizáu en collaboración colos conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies.