8 filmes sobre la guerra de Pablo Casanueva tamién se suma a la llista depués de llevar el Premiu Curtiumetraxes Llaboral Cinemateca nel Festival Internacional de Cine de Xixón

La programadora Sara Xiol, la distribuidora Alicia Albares y l’actriz y directora Nerea Barros formaron el comité de valoración d’esta convocatoria, a la que se presentaron un total de 20 trabayos

02/12/2022.- El último comienzo de Gloria Gutiérrez Asla y Jorge Delgado, La nueche de Diego Flórez, Lata de sardinas d’Antonio Llaneza y Zoe & Renée d’Iván Ladeiras son los trabayos que s’acaben d’incorporar al catálogu de distribución Llaboral Cinemateca Curtios, una ferramienta importante que la Conseyería de Cultura, Política Llingüística y Turismu pon a la disposición de los cineastes asturianos pa la promoción y distribución de los sos trabayos en certámenes cinematográficos nacionales y internacionales.

Amás, tamién s’incorpora al catálogu’l curtiumetraxe 8 filmes sobre la guerra de Pablo Casanueva, depués de llevar el Premiu Curtiumetraxes Llaboral Cinemateca nesta postrer edición del Festival Internacional de Cine de Xixón (FICX) onde compitió na sección Asturies Curtiumetraxes.

La comisión de valoración d’esta convocatoria del programa Curtiumetraxes Llaboral Cinemateca, a la que se presentaron un total de 20 trabayos, tuvo formada por Sara Xiol, programadora del Mecal Pro. Festival de Cine d’Animación y Curtiumetraxes de Barcelona; Alicia Albares, socia fundadora de Yaq Distribución y directora de cine, y Nerea Barros, actriz ganadora del Goya a Meyor Actriz Revelación por La isla mínima y directora de cine.

El último comienzo de Gloria Gutiérrez Asla y Jorge Delgado

Nes hores últimes y caótiques del planeta, Marta y Jaime faen match nuna app de cites. Ensin tiempu malpenes pa pensar, cítense en casa d’él, nun pueblu solitariu cerca de la mar, pa pasar xuntos, apartaos de too, el fin del mundu. Pero... ¿cómo saber cuál ye’l final correctu d’ente tolos posibles?

Gloria Gutiérrez Asla y Jorge Delgado firmen esta historia d’amor en momentos desesperaos, qu’atopen una salida somorguiándose no fantástico.

La nueche de Diego Flórez

Al escurecer, debaxo d’una farola, un vieyu recuerda les nueches de branu de cuando neñu. Partiendo d’una anécdota familiar, Diego Flórez construye en La nueche una atmósfera opresiva y terrorífica, con ecos a David Lynch.

Lata de sardinas d’Antonio Llaneza

En Lata de sardinas, el cineasta uviedín Antonio Llaneza realiza’l retratu d’una mocedá contemporáneo desarraigonao y perdío, nun curtiumetraxe que destaca pola so fuercia visual poderosa.

Joel, un rapaz catalán, vuelve a Barcelona pa dir al entierru de so pá. Ellí recíbenlu la so hermana y familiares. El desapegu y la falta de rellaciones apártenlu de les sos obligaciones morales. Xunto al so amigu Borja, va evadise caleyando pela ciudá, al empar que repara na decadencia social paulatina de la que lleva tantu tiempu fuxendo.

Zoe & Renée d’Iván Ladeiras

Con una puesta n’escena minimalista y basándose namás nes sos dos actrices, Xana del Mar y Bea Canteli, Ladeiras narra una historia d’amor apasionada que transita per dellos estaos emocionales en pocu tiempu.

Renée ye una amante de la pintura. Desque pierde la visión, tien que lluchar colos fechos pa nun se perder a sí mesma. Zoe, la so pareya, va ayudala a encarar los sos mieos pa superar el duelu.

8 filmes sobre la guerra de Pablo Casanueva

Pablo Casanueva llevó’l Premiu Curtiumetraxes Llaboral Cinemateca, que se concede nel marcu del FICX, con esti álbum audiovisual formáu por ocho curtiumetraxes onde s’allega a la represión franquista nel conceyu de Ribeseya. Un repasu pelos testimonios, la investigación histórica y la documentación d’archivu.

Estos curtios, amás de los otros 16 presentaos a esta convocatoria, van pasar a formar parte del Archivu de curtiumetraxes asturianos que Llaboral Cinemateca pon a disposición de programadores, investigadores, profesionales y aficionaos, valiendo asina d’escaparate del talentu creativu asturianu y promoviendo la medría del sector audiovisual del Principáu. Amás, tamién pasen a formar parte del Archivu del Curtiumetraxe Español qu’ellabora la Coordinadora del Curtiumetraxe Español.

Llaboral Cinemateca Curtios ye’l proyectu de distribución de curtiumetraxes asturianos de Llaboral Cinemateca, l’espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura.