Últimos VídeosNoticies

Actividaes pa disfrutar y conocer la cultura tradicional y el patrimoniu del Camín de Santiago con Asturies, Cultura en Rede

Cultura en Rede

22/11/2022.- El programa Asturies, Cultura en Rede ufierta delles actividaes hasta últimos d’añu pa disfrutar y conocer la cultura tradicional y el patrimoniu del Camín de Santiago al traviés de los circuitos temáticos de cultura tradicional y Xacobéu.

Conferencies, conciertos, danza o xuegos formen parte de la programación del circuitu de cultura tradicional d’Asturies, Cultura en Rede p’adientrase na historia, arqueoloxía, patrimoniu, cultura popular y tradición asturiana. Nel marcu d’esti circuitu, Higiénico Papel Teatro va ufiertar esti martes, 23 de payares, una conferencia didáctica sobre Los reyes asturianos en Ḷḷena; Sergio Buelga va falar sobre Un sieglu de teatru del pueblu: el Teatru Popular Asturianu nuna ponencia en Llangréu’l xueves 24; Toli Morilla va xuntar música y poesía en Mujeres poetas en canciones en Ḷḷena’l sábadu 26; y Elisabet Martín Teatro va llevar los Cuentos de nuestros abuel@s a Llanes el miércoles 30.

Nel mes d’avientu va haber narración oral en Ḷḷena, con Factoría Norte y Contábamelo la bruxa y con Carlos Alba Cellero y La matazuga; y música, cola Banda de Gaites Xiranda y el so proyectu Xiranda Brass Band en Colunga y con El Arca de Mozart, que va interpretar el conciertu Esa ye la de… en Navia y el cuentu musical Las aventuras de Torpecillo y Remangu en Cangas del Narcea. Nun van faltar los xuegos tradicionales nes Olimpiaes asturianes, con Sergio Buelga, en Gozón; la danza tradicional con Sal a baillar,d’Aladanza Educación y Tradición, en Grau, y Higiénico Papel Teatro va repasar de manera teatral y con humor Los reyes asturianos en Navia.

Nel circuitu de cultura tradicional programáronse 81 eventos de 24 profesionales en 31 conceyos, con una inversión de más de 74.000 euros nesti últimu semestre del añu.

Asturies, Cultura en Rede tamién promueve’l Camín de Santiago de la que pasa per Asturies, amás del patrimoniu material y inmaterial que lu conforma, al traviés d’espectáculos, conciertos y otres actividaes culturales del circuitu Xacobéu que, con una inversión d’alredor de los 90.000 euros, programó 39 eventos de 25 profesionales en 19 conceyos ente los meses de xunetu y avientu.

Nes selmanes venideres, el públicu va poder disfrutar en Corvera d’El campo de la estrella, de Dana Raz Dance Projects, un espectáculu de danza contemporánea inspiráu nel Camín de Santiago; de Los cuentos del Camino, de David Acera, en Grau; y de les comedies Un peregrino muy casto, de Luz de Gas Teatro, en Ḷḷena, y El Camino entretenido, d’El Callejón del Gato, en Navia.

En Ḷḷena, Slum Suit va siguir el Camín d’Iturralde al traviés de la música que se pue sentir a lo llargo del Camín; El ilusionista va mostrar La magia del Camino en Ḷḷena, Llanes y Corvera; y Elisabet Martín Teatro va poner n’escena ¡Buen camino! Historias y leyendas del Camino de Santiago en Ḷḷena.

Los circuitos d’Asturies, Cultura en Rede son un proyectu dela Conseyería de Cultura, Política Llingüística y Turismu, fechu en collaboración colos Conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies. Amás de los circuitos de cultura tradicional y Xacobéu, tamién hai circuitos temáticos d’artes escéniques, música, artes visuales, Autores nel Camín, lliteratura y Cuadonga 2022 - Camín de los santuarios.

Slide 2